वीरगञ्ज । नेपाल कम्युनिस्ट पार्टी (बहुमत) को दुई महिने अभियानअन्तर्गत आज पर्सा जिल्ला समितिको बैठक वीरगञ्जमा सम्पन्न भएको छ । बैठकको अध्यक्षता तथा सञ्चालन जिल्ला सेक्रेटरी शेरबहादुरले गरेका थिए । बैठकका प्रमुख अतिथि पार्टीको ब्युरो इन्चार्ज शार्दुलले वर्तमान संसदीय व्यवस्थाभित्र रहेका तथाकथित कम्युनिस्टहरू जनविरोधी भएको आरोप लगाए । उनले प्रचण्ड र माधव नेपालले ‘सबै कम्युनिस्ट एक होऔँ’ भन्ने नारा लगाएर भ्रम फैलाइरहेको भन्दै उनीहरू वास्तविक कम्युनिस्ट नभई संसदीय व्यवस्था र दलाल पुँजीवादका रक्षक भएको दाबी गरे । उनले कम्युनिस्टको नाममा हालसम्म ६ जना प्रधानमन्त्री बने पनि देश र श्रमिक जनताको पक्षमा कुनै उल्लेखनीय काम नगरेको बताए । “उनीहरूले दलाल पुँजीवादको रक्षा गरे र आफ्नै निजी जीवन सुदृढ बनाए,” उनले भने । शार्दुलले अहिले देशमा बेरोजगारी, युवा पलायन, महँगी, भ्रष्टाचार र वित्तीय शोषण चरम सीमामा पुगेको उल्लेख गर्दै सामान्य जनता बिरामी पर्दा औषधि किन्न नसक्ने र गरिब वर्ग आफ्ना सन्तानलाई पढाउन नसक्ने अवस्थामा पुगेको बताए । यस्तो परिस्थितिका सिर्जनाकर्ता संसदीय कम्युनिस्टहरू नै भएको उनको आरोप थियो ।
उनले यी सबै समस्याको समाधानका लागि वैज्ञानिक समाजवादी व्यवस्था स्थापना र नयाँ जनसंविधान आवश्यक रहेको भन्दै जनसंविधान निर्माणको आन्दोलनमा एकजुट भएर लाग्न आह्वान गरे । बैठकमा जिल्ला इन्चार्ज विजयले पनि धारणा राख्दै वर्तमान संविधान भदौ आन्दोलनबाट खारेज भइसकेको दाबी गर्दै जनसंविधान निर्माणको आन्दोलनमा सहभागी हुन सबैलाई आग्रह गरे । बैठकले जिल्लाभित्र गरिब किसान, सुकुम्बासीहरूले भोग्दै आएका समस्याको समाधानका लागि आन्दोलन गर्ने निर्णय समेत गरेको छ ।