काठमाडौं । नेपाली कांग्रेसका नेता प्रदीप पौडेलले पार्टी महाधिवेशन नगरी निर्वाचनमा गए कांग्रेसले सर्मनाक हार व्यहोर्नुपर्ने चेतावनी दिएका छन् । शुक्रबार काठमाडौंमा पत्रकारहरूसँगको कुराकानीमा उनले महाधिवेशन टार्दै चुनावमा जानु पार्टीका लागि प्रत्युत्पादक हुने बताएका हुन् । संसद पुनर्स्थापनाको बाटो रोजेर महाधिवेशन ढिलो गर्नु उचित नहुने उल्लेख गर्दै पौडेलले रणनीतिक हिसाबले पनि महाधिवेशन अपरिहार्य रहेको बताए । “अधिवेशन नगरी निर्वाचनमा जाँदा कांग्रेसले सर्मनाक हार हुने स्थिति व्यहोर्छ,” उनले भने, “अधिवेशन गरेर निर्वाचनमा बढी सिट जितिन्छ भने रणनीतिक हिसाबले पनि अधिवेशन गर्नुपर्छ ।” नेकपा एमालेले समेत महाधिवेशन सम्पन्न गरिसकेको सन्दर्भ उल्लेख गर्दै उनले कांग्रेसले अब ढिलाइ गर्नु लाजमर्दो हुने टिप्पणी गरे । “एउटा कम्युनिष्ट पार्टीले अधिवेशन गरिसक्यो, त्यसले सकारात्मक सन्देश दिएको छ,” पौडेलले भने, “अब कांग्रेसले पनि महाधिवेशन गर्नैपर्छ ।”
उनले महाधिवेशनमार्फत पार्टीलाई समयअनुकूल अद्यावधिक गर्न नसके देशलाई अगाडि बढाउन सक्छौँ भन्ने विश्वास जनतामा नजाग्ने स्पष्ट पारे । “हामी आफ्नै पार्टीलाई विधानअनुसार अगाडि बढाउन सक्दैनौँ भने देश चलाउँछौँ भन्ने कुरा कसरी पत्याइन्छ ?” भन्दै उनले प्रश्न गरे । महाधिवेशन नगरे पदप्रतिको लोभका कारण नेतृत्व परिवर्तन नचाहेको सन्देश जाने उनको भनाइ छ । “पार्टी निर्वाचनको मुखमा छ, अधिवेशन नगर्दा पार्टीमा चलायमानता आउँदैन,” पौडेलले थपे ।