धनुषा । नेकपा (बहुमत) २ नम्बर ब्युरोले सञ्चालन गरिरहेको जनसंविधानका लागि तराई–मधेश जनसंघर्ष अभियान अन्तर्गत आज धनुषा जिल्लाको धनुषाधाममा कोणसभा सम्पन्न भएको छ । मंगलबार दिउँसो १ बजे र्‍यालीसहित बजार परिक्रमा गर्दै धनुषाधाम चोकमा कोणसभा आयोजना गरिएको थियो । कोणसभामा बोल्दै नेकपा (बहुमत) २ नम्बर ब्युरोका इन्चार्ज शार्दुलले देशमा दलाल पूँजीपतिहरूको शासन चलिरहेको आरोप लगाए । उनले भदौ २३/२४ को आन्दोलनपछि विदेशी एजेण्डामा आधारित सरकार बनेको दाबी गर्दै वर्तमान र पूर्व सत्तारूढ दलहरू राज्यको ढुकुटी दोहनमा संलग्न रहेको बताए ।
शार्दुलले सत्तामा रहेका दलहरूबीच फाल्गुन २१ पछि सत्ता कसले लिने भन्ने विषयमा आपसी संघर्ष भइरहेको उल्लेख गर्दै दुबै पक्ष दलाल सत्ताका प्रतिनिधि भएको जिकिर गरे । उनले संसदवादी राजनीतिक दलहरूले प्रस्तुत गर्ने कुनै पनि विकल्पले नेपाली समाजले भोगिरहेका समस्याको समाधान दिन नसक्ने बताए । साथै उनले अबको निकास वैज्ञानिक समाजवादी व्यवस्थाको स्थापना मात्र भएको दाबी गर्दै फाल्गुन २१ को निर्वाचन वा संसद पुनर्स्थापना दुबै समाधान नभएको स्पष्ट पारे । कोणसभामा केन्द्रीय सचिवालय सदस्यहरू रोजन रखाल, गौरी मण्डल तथा महिला नेतृ रेखा चौहानले समेत मन्तव्य राखेका थिए। कार्यक्रमको सञ्चालन जिल्ला सचिव नगेन्द्र दासले गरेका थिए ।