सिराहा । नेपाल कम्युनिष्ट पार्टी (बहुमत) को २ नम्बर ब्यूरोले सञ्चालन गरेको जनसंविधानका लागि तराई–मधेश जनसंघर्ष अभियान अन्तर्गत आज सिराहा सदरमुकाममा कोणसभा सम्पन्न भएको छ । नारा–जुलुससहित नगर परिक्रमा गर्दै आयोजित कोणसभालाई सम्बोधन गर्दै पार्टी केन्द्रीय सचिवालय सदस्य तथा अभियान टिमका प्रमुख गौरी मण्डल ले देश अहिले गम्भीर राजनीतिक प्रतिगमनतर्फ धकेलिएको आरोप लगाउनुभयो । उहाँले “पुरानो संविधान कार्यान्वयनमा छैन, नयाँ संविधान पनि बनिरहेको छैन । यथास्थितिको आवरणमा प्रतिगमन भइरहेको छ,” भन्नुभयो । मण्डलले देशको सत्ता विदेशी एजेन्डा बोकेका दलालहरूको हातमा पुगेको आरोप लगाउँदै सरकारले एकातिर फागुन २१ गते निर्वाचन घोषणा गरी चुनावी हल्ला फैलाइरहेको र अर्कोतिर आफ्नो स्वार्थ गुम्ने डरले संसद पुनर्स्थापनाको कोलाहल मच्चाइरहेको बताउनुभयो ।
उहाँका अनुसार अहिलेको राजनीतिक निकास न त निर्वाचन हो, न त संसद पुनर्स्थापना नै । “वर्तमान संकटको वास्तविक निकास भनेको स्वाधीन संयुक्त सरकारको गठन र जनसंविधानको निर्माण हो,” मण्डलले स्पष्ट पार्नुभयो । कोणसभामा पार्टीका सिराहा जिल्ला सचिव उचित महरा ले पनि मन्तव्य राख्नुभएको थियो । कार्यक्रमको सञ्चालन बिन्दु मण्डल ले गर्नुभएको थियो ।