मकवानपुर। नेपाल कम्युनिष्ट पार्टी (बहुमत) ले सञ्चालन गरिरहेको जनसंविधानका लागि जनसंघर्ष अभियान अन्तर्गत मकवानपुर जिल्लाको हेटौँडा उपमहानगरपालिका–चिसापानी बजारमा अभियान सभा सम्पन्न भएको छ । मकवानपुर जिल्ला इन्चार्ज क. अग्रिमको प्रमुख आतिथ्यतामा सम्पन्न कार्यक्रममा पार्टीका केन्द्रिय सल्लाहकार क. पेन्सन लामा, शहीद परिवारको तर्फबाट क. उदय गोले तथा पार्टीका विभिन्न नेता–कार्यकर्ताहरूको उपस्थिति रहेको थियो । सभालाई सम्बोधन गर्दै वक्ताहरूले देशको वर्तमान राजनीतिक अवस्था गम्भीर संकटमा फसेको आरोप लगाउँदै दलाल तथा संसदवादी सत्ताले जनताको हितविपरीत काम गरिरहेको बताए । उनीहरूले विदेशी हस्तक्षेपका कारण मुलुक अस्थिर बनेको तथा वर्तमान सरकारले जनताको बलिदानलाई सम्मान नगरेको दाबी गरे ।
वक्ताहरूले हालको संविधान खारेज गरी नयाँ जनमुखी संविधान निर्माण गर्नुपर्ने, स्वाधीन संयुक्त सरकार गठन गर्नुपर्ने र जननिर्वाचित कार्यकारी प्रमुखको व्यवस्था हुनुपर्नेमा जोड दिए । साथै, दलाल पुँजीवादी व्यवस्थाको अन्त्य गर्दै वैज्ञानिक समाजवादी व्यवस्था स्थापना गर्नु आजको आवश्यकता रहेको उनीहरूको भनाइ थियो । सभामा सरकारले घोषणा गरेको फागुन २१ गतेको निर्वाचनलाई जनताले बहिष्कार गर्नुपर्ने आह्वान समेत गरिएको थियो । कार्यक्रमको सञ्चालन मकवानपुर जिल्ला सदस्य क. अनिलले गरेका थिए भने स्वागत मन्तव्य क. श्यामले राखेका थिए । कार्यक्रममा ने.क.पा. (बहुमत) सिन्धुली जिल्लाका पूर्व सचिव क. रमेश नेपालीको समेत विशेष उपस्थिति रहेको थियो ।