काठमाडौं । नेपाली कांग्रेसका महामन्त्री गगन थापा र विश्वप्रकाश शमाले पार्टी विधानअनुसार पुस २७ र २८ गते काठमाडौंको भृकुटीमण्डपमा आयोजना हुन गइरहेको विशेष महाधिवेशन वैधानिक, अनिवार्य र बाध्यकारी रहेको स्पष्ट पारेका छन् । महामन्त्री गगन थापा र विश्वप्रकाश शर्माद्धारा जारी विज्ञप्तिमा महाधिवेशन प्रतिनिधिहरूले विशेष महाधिवेशनको माग गर्दै गरेको पहल प्रतिनिधिहरूको वैधानिक अधिकार भएको उल्लेख गरिएको छ । साथै, विधानबमोजिम आवश्यक भइसकेको विशेष महाधिवेशन नबोलाउनु, विधानको पालना नगर्नु तथा जिम्मेवारीअनुसार काम नगर्नु संविधान र राजनीतिक दलसम्बन्धी कानुनविपरीत हुने स्पष्ट गरिएको छ । विज्ञप्तिमा पार्टी विधान तथा कानुनको पालना गर्नु केन्द्रीय नेतृत्वको कर्तव्य र जिम्मेवारी भएको जनाउँदै लोकतान्त्रिक पार्टीका जिम्मेवार पदाधिकारीहरूले आफ्नो वैधानिक र नैतिक दायित्व पूरा गर्नुपर्नेमा जोड दिइएको छ ।
नेपाली कांग्रेसको विधानको धारा ३(२) तथा धारा २७(१) अनुसार पुस २७ र २८ गते आयोजना हुने विशेष महाधिवेशनमा सहभागी भई यसलाई व्यवस्थित र भव्य रूपमा सम्पन्न गर्न सम्पूर्ण महाधिवेशन प्रतिनिधिहरूलाई हार्दिक आह्वान गरिएको छ । विज्ञप्तिमा विशेष महाधिवेशन बदलिएको समयको कांग्रेसका लागि र बदलिँदो देशका लागि आवश्यक भएको उल्लेख गर्दै पार्टीमा नयाँ ऊर्जा भर्ने संकल्पसमेत व्यक्त गरिएको छ । कठिन परिस्थितिमा पनि पार्टीलाई एकढिक्का राख्ने प्रतिबद्धता जनाउँदै विज्ञप्तिको अन्त्य गरिएको छ ।