काठमाडौँ — जापानमा सम्पन्न तल्लो सदनको निर्वाचनमा प्रधानमन्त्री साने ताकाइची नेतृत्वको लिबरल डेमोक्रेटिक पार्टी (एलडीपी) ले दुई तिहाई बहुमत हासिल गरेको छ । आइतबार भएको निर्वाचनमा ४६५ सिटमध्ये एलडीपीले ३१६ सिट जित्दै स्पष्ट बहुमत सुरक्षित गरेको हो । एलडीपीसँग गठबन्धनमा रहेको जापान इनोभेसन पार्टीले पनि ३६ निर्वाचन क्षेत्रमा विजय हासिल गरेको छ । यससँगै सत्तारुढ गठबन्धनले कुल ३५२ सिट जित्दै संसदमा मजबुत उपस्थिति जनाएको छ । सन् १९४७ यता जापानको तल्लो सदनमा कुनै एक दलले यस प्रकारको बलियो बहुमत ल्याएको पहिलो पटक भएको बताइएको छ । यस परिणामसँगै प्रधानमन्त्री ताकाइचीले आफ्नो नीति तथा कार्यक्रम कार्यान्वयन गर्न सहज राजनीतिक आधार पाएकी छन् । अब ताकाइची सरकारसामु जापानको अर्थतन्त्र सुदृढ बनाउने प्रमुख चुनौती रहेको छ। न्यून आय, बढ्दो मूल्यवृद्धि र जनजीवनमा देखिएका आर्थिक समस्यालाई सम्बोधन गर्नेगरी बजेट ल्याउनु सरकारको प्राथमिकता रहने बताइएको छ । मध्य फेब्रुअरीदेखि सुरु हुने संसद् अधिवेशनमा बजेट विधेयक प्रस्तुत गरिने तयारी छ ।
यसैबीच, ताकाइचीले जापानको सुरक्षा नीति संशोधन गर्ने संकेत दिएकी छन् । प्रस्तावित नीतिले जापानको सैन्य क्षमता विस्तार गर्ने, हतियार निर्यातसम्बन्धी प्रतिबन्ध हटाउने तथा रक्षा खर्च वृद्धि गर्ने योजना समेट्ने बताइएको छ । यस्ता कदमले दोस्रो विश्वयुद्धपछि अपनाइएको शान्तिवादी संवैधानिक धाराबाट जापानलाई टाढा लैजान सक्ने भन्दै विज्ञहरूले चिन्ता व्यक्त गरेका छन् । त्यस्तै, विदेशी नागरिकमाथि कडाइ गर्ने तथा उनीहरूको गतिविधिमा निगरानी बढाउने नीति पनि चर्चामा छ । यसले जनअधिकार र नागरिक स्वतन्त्रतामा असर पार्न सक्ने विश्लेषकहरूको धारणा छ । उता अमेरिकी राष्ट्रपति डोनाल्ड ट्रम्पले सुरक्षा क्षेत्रमा थप खर्च गर्न जापानमाथि दबाब दिइरहेका बेला रक्षा खर्च वृद्धि गर्ने ताकाइचीको घोषणा अर्थपूर्ण रूपमा हेरिएको छ ।