काठमाडौं, फागुन १ — नेपाल कम्युनिस्ट पार्टी (बहुमत) ले ३१औँ जनयुद्ध दिवसका अवसरमा प्रेस वक्तव्य जारी गर्दै जनयुद्धको ऐतिहासिक महत्व, वर्तमान राजनीतिक अवस्थाको समीक्षा र भावी कार्यदिशाबारे आफ्नो धारणा सार्वजनिक गरेको छ । पार्टीका महासचिव कञ्चनद्वारा जारी वक्तव्यमा २०५२ साल फागुन १ गते सुरु भएको जनयुद्धले नेपाली राजनीतिक इतिहासमा निर्णायक हस्तक्षेप गरेको उल्लेख गरिएको छ । वक्तव्यमा जनयुद्धले संवैधानिक राजतन्त्रको अन्त्य र संघीय लोकतान्त्रिक गणतन्त्र स्थापना प्रक्रियामा महत्वपूर्ण भूमिका खेलेको दाबी गरिएको छ । वक्तव्यमा २०४६ सालपछि स्थापित संवैधानिक राजतन्त्र र बहुदलीय व्यवस्थाले जनताको आधारभूत आवश्यकता, जातीय मुक्ति, क्षेत्रीय असमानता र वर्गीय विभेद समाधान गर्न नसकेको टिप्पणी गरिएको छ । राज्यसत्ता सीमित सम्भ्रान्त वर्गको हातमा केन्द्रित रहेको आरोप लगाउँदै पार्टीले जनयुद्ध त्यसैको परिणामस्वरूप सुरु भएको जनाएको छ ।
पार्टीले विगत तीन दशकमा प्राप्त राजनीतिक उपलब्धिहरू अपेक्षित रूपमा संस्थागत हुन नसकेको उल्लेख गर्दै राजनीतिक परिवर्तनसँगै आर्थिक तथा सामाजिक संरचनामा आमूल परिवर्तन हुन नसकेको बताएको छ । गणतन्त्र स्थापना भए पनि दलाल पुँजीवाद हाबी भएको र श्रमिक, किसान तथा उत्पीडित समुदायको अवस्था सुधार हुन नसकेको दाबी वक्तव्यमा गरिएको छ । यस क्रममा पार्टीले तत्कालीन माओवादी आन्दोलनभित्र आएको वैचारिक विचलनका कारण आन्दोलन विभाजित भएको विश्लेषण प्रस्तुत गरेको छ । आफूले भने वैज्ञानिक समाजवादको मार्ग अवलम्बन गर्दै नयाँ क्रान्तिकारी दिशा अगाडि सारेको दाबी गरिएको छ । वक्तव्यमा वर्तमान राजनीतिक संकटबाट निकासका लागि स्वाधीन संयुक्त सरकार गठन, जनसंविधान निर्माण र वैज्ञानिक समाजवादी व्यवस्था स्थापना आवश्यक रहेको औँल्याइएको छ । साथै, पार्टीले देशभक्त, श्रमिक, उत्पीडित समुदाय र क्रान्तिकारी शक्तिहरूलाई एकताबद्ध हुन आह्वान गरेको छ ।