बुटवल/कपिलवस्तु — नेपाल कम्युनिस्ट पार्टी (बहुमत)का केन्द्रीय सदस्य मणीलाई बुटवलबाट प्रहरीले पक्राउ गरेको छ । पार्टीले उक्त गिरफ्तारीप्रति कडा आपत्ति जनाउँदै यसलाई “राज्यको दमनकारी नीति” को निरन्तरता भएको दाबी गरेको छ । पार्टीका अनुसार, नेपाल बन्दको कार्यक्रम चलिरहेकै बेला प्रहरीले घरमै पुगेर नेता मणीलाई नियन्त्रणमा लिएको हो । “यदि सरकारले नेता मणीलाई तत्काल रिहा नगरे, त्यसबाट उत्पन्न हुने गम्भीर राजनीतिक परिणामको सम्पूर्ण जिम्मेवारी राज्य पक्षले लिनुपर्नेछ,” पार्टीका एक नेताले जनमेलसँग भने । उनले दमन र गिरफ्तारीले विचार र क्रान्तिलाई कैद गर्न नसक्ने जिकिर गर्दै जनअधिकार र स्वाधीनताको पक्षमा संघर्ष निरन्तर रहने बताए ।
यसैबीच, कपिलवस्तुबाट पार्टीका जिल्ला सदस्य शोभे थारुलाई पनि प्रहरीले घरमै गएर पक्राउ गरेको जनाइएको छ । पार्टीको लुम्बिनी ब्यूरोका एक नेताका अनुसार, बेलुका करिब ८ः३० बजे पिपरा इलाका प्रहरी कार्यालयको टोलीले उनलाई घरबाटै नियन्त्रणमा लिएको हो । घटनाबारे प्रहरी पक्षबाट औपचारिक प्रतिक्रिया आउन बाँकी छ । पक्राउ गरिएका नेताहरूलाई कुन आरोपमा नियन्त्रणमा लिइएको हो भन्ने विषयमा पनि स्पष्ट जानकारी सार्वजनिक भएको छैन । पार्टीले भने आफ्ना नेता–कार्यकर्तामाथि भइरहेको कारबाहीलाई राजनीतिक प्रतिशोधको रूपमा व्याख्या गरेको छ ।