काठमाडौं । नेपाल कम्युनिस्ट पार्टी (बहुमत)ले नेपाल कम्युनिष्ट पार्टीका अध्यक्ष ऋषि कट्टेललाई गरिएको पक्राउप्रति आपत्ति जनाएको छ । पार्टीका केन्द्रीय कार्यालय सचिव अविरलद्वारा जारी वक्तव्यमा आज दिउँसो करिब १२ बजे पार्टी कार्यालयबाट वर्तमान सरकारको गृह प्रशासनद्वारा कट्टेललाई गिरफ्तार गरिएको जनाएको हो ।
वक्तव्यमा हिजो मात्रै पार्टीका महासचिव धर्मेन्द्र बास्तोला ‘कञ्चन’लाई पक्राउ गरिएको स्मरण गर्दै पछिल्ला घटनाक्रमले सरकार फासिवादी कदमतर्फ उन्मुख भइरहेको दाबी गरिएको छ । पार्टीले यसलाई राजनीतिक प्रतिशोध र दमनकारी कार्यशैलीको निरन्तरता भएको आरोप लगाएको छ ।
नेकपा (बहुमत)ले पक्राउ परेका सम्पूर्ण नेताहरूलाई बिना सर्त रिहा गर्न तथा यस्ता कदम तत्काल रोक्न सरकारसँग जोडदार माग गरेको छ ।