काठमाडौँ — अमेरिकी राष्ट्रपति डोनाल्ड ट्रम्पले इरानसँग सम्भावित सम्झौता वा सैन्य कारबाहीबारे आगामी १० दिनभित्र स्पष्ट निर्णय हुने बताएका छन् । वाशिंगटन डीसीमा आयोजित ‘बोर्ड अफ पीस’ उद्घाटन कार्यक्रममा सम्बोधन गर्दै ट्रम्पले इरानको परमाणु कार्यक्रमका विषयमा वार्ता जारी रहेको जानकारी दिए । उनले भने, “हामी सार्थक र प्रभावकारी सम्झौता चाहन्छौँ । यदि त्यो सम्भव भएन भने, परिणाम राम्रो नहुन सक्छ ।” हालका दिनमा अमेरिकाले मध्यपूर्व क्षेत्रमा आफ्नो सैन्य उपस्थिति बढाएको छ । यसले सम्भावित तनाव र सैन्य कारबाहीको आशंकालाई थप बल दिएको विश्लेषकहरू बताउँछन् । यता स्विट्जरल्यान्डमा अमेरिकी र इरानी प्रतिनिधिबीच सकारात्मक संवाद भइरहेको दाबी गरिएको छ ।
तर अमेरिकी संसद्भित्र भने मतभेद देखिएको छ । डेमोक्रेटिक सांसदहरूका साथै केही रिपब्लिकन नेताहरूले संसद्को स्वीकृतिबिना इरानविरुद्ध कुनै पनि सैन्य कारबाही गर्न नहुने भन्दै चेतावनी दिएका छन् । आफ्नो सम्बोधनमा ट्रम्पले विशेष दूत स्टीभ विटकफ र आफ्ना ज्वाइँ ज्यारेड कुशनले इरानसँग सकारात्मक छलफल गरेको उल्लेख गरे । तथापि, इरानसँग “सार्थक र दिगो” सम्झौता गर्न सजिलो नभएको उनले स्वीकार गरे । अमेरिका–इरान सम्बन्ध विगत केही वर्षयता तनावपूर्ण रहँदै आएको छ। आगामी १० दिनभित्र ट्रम्प प्रशासनले लिने निर्णयले क्षेत्रीय तथा अन्तर्राष्ट्रिय राजनीतिमा महत्वपूर्ण प्रभाव पार्ने अपेक्षा गरिएको छ ।