काठमाडौं । नेपाल कम्युनिस्ट पार्टी (बहुमत) ले आफ्ना नेताहरूको गिरफ्तारीप्रति कडा आपत्ति जनाएको छ । पार्टीले प्रेस वक्तव्य जारी गर्दै फागुन ८ गते काभ्रे जिल्ला इन्चार्ज सुन्तली थोकरलाई उपचारका लागि अस्पताल जाँदै गर्दा पनौतीबाट दिउँसो ३ बजे पक्राउ गरिएको जनाएको छ । वक्तव्यअनुसार, यसअघि फागुन ५ गते पार्टीका महासचिव धर्मेन्द्र बास्तोला ‘कञ्चन’ सहित काभ्रे जिल्ला सचिव विष्णु तिमिल्सिना, कपिलवस्तु जिल्ला सदस्य सोभे थारु लगायतलाई पनि प्रहरीले गिरफ्तार गरेको थियो ।
पार्टीले आफ्ना नेता–कार्यकर्ताको घर–कोठामा पुगेर गरिएको गिरफ्तारीलाई “राज्य आतंक” को संज्ञा दिँदै तत्काल रिहाइको माग गरेको छ । सरकारले फरक राजनीतिक धारणा राखेकै आधारमा दमनकारी र अलोकतान्त्रिक शैली अपनाएको आरोप समेत वक्तव्यमा उल्लेख छ ।
गिरफ्तारीको विरोधमा पार्टीले फागुन १० गते सरकारको पुतला दहन तथा फागुन १२ गते देशव्यापी मशाल जुलुस आयोजना गर्ने घोषणा गरेको छ । साथै, दार्चुला, डडेल्धुरा, जाजरकोट लगायतका जिल्लामा जनताले चुनावको औचित्यमाथि प्रश्न उठाएको दाबी गर्दै पार्टीले “वास्तविक सुशासन र अधिकारको पक्षमा” संघर्ष जारी रहने जनाएको छ ।