काठमाडौँ — नेपाल कम्युनिष्ट पार्टी (बहुमत) ले पार्टी महासचिव धर्मेन्द्र बास्तोला कञ्चनलगायत नेताहरूलाई गरिएको गिरफ्तारीको विरोधमा देशव्यापी रूपमा प्रधानमन्त्री सुशीला कार्की र गृहमन्त्री ओमप्रकाश अर्याल को पुत्ला दहन गरेको छ । पार्टीका अनुसार सरकारद्वारा “विनाकारण” महासचिव बास्तोलासहित नेताहरूलाई गिरफ्तार गरिएको भन्दै पूर्वघोषित कार्यक्रमअनुसार देशका विभिन्न जिल्लामा पुत्ला दहन गरिएको हो । पार्टीका एक सचिवालय सदस्यले जनमेलसँग कुरा गर्दै गिरफ्तारीलाई “राजनीतिक प्रतिशोध र दमन” को संज्ञा दिएका छन् ।
नेकपा(बहुमत)ले देशको वर्तमान राजनीतिक संकट समाधानका लागि “स्वाधीन संयुक्त सरकार” गठन र “जनसंविधान” जारी गर्नुपर्ने माग अघि सारेको छ । पार्टीका अनुसार यी माग पूरा नभए देश गम्भीर भूराजनीतिक संकटतर्फ धकेलिन सक्ने चेतावनी दिँदै निर्वाचन खारेजी नै विकल्प भएको दाबी गरिएको छ । पार्टीले महासचिव बास्तोलासहित गिरफ्तार नेताहरूको अविलम्ब रिहाइको माग गर्दै यस अघि नै आन्दोलनका कार्यक्रम घोषणा गरिसकेको छ ।