काठमाडौँ, फागुन १२ । अखिल(क्रान्तिकारी)का केन्द्रीय सदस्य तथा कास्की जिल्ला संयोजक बासुदेव बुढालाई पक्राउ गरिएको घटनाप्रति उक्त संगठनले कडा आपत्ति जनाएको छ । संगठनका केन्द्रीय अध्यक्ष विरेन्द्र शाहले मंगलबार एक विज्ञप्ति जारी गर्दै बुढालाई कास्कीको मालपोत क्षेत्रबाट २०८२ फागुन ११ गते संगठनात्मक काममा भएको बेला बिना कारण पक्राउ गरिएको जनाएका हुन । विज्ञप्तिमा भनिएको छ, संगठनमा आबद्ध भएकै आधारमा पूर्वाग्रह राखी गिरफ्तारी गरिएको आरोप लगाइएको छ ।
अखिल(क्रान्तिकारी) ले उक्त कदमलाई लोकतन्त्र र मानवअधिकारविरुद्धको गतिविधि भन्दै ‘कायरतापूर्ण श्वेत आतंक’ को संज्ञा दिएको छ । संगठनले सरकारको उक्त कार्यप्रति कडा आक्रोश व्यक्त गर्दै तत्काल रिहा गर्न माग गरेको छ । विज्ञप्तिमा बिना कारण पक्राउ गरिएका बुढालाई अविलम्ब सम्मानपूर्वक रिहा गर्न सरकारसँग जोडदार माग गरिएको छ । साथै यस्ता गतिविधि बन्द गर्न चेतावनी समेत दिइएको छ ।