काठमाडौँ — नेपाल कम्युनिस्ट पार्टी (बहुमत) ले आफ्ना नेताको गिरफ्तारीप्रति गम्भीर आपत्ति जनाउँदै तत्काल रिहाइको माग गरेको छ । पार्टीको केन्द्रीय कार्यालय सचिव अविरलद्धारा जारी प्रेस वक्तव्यमा पार्टीका केन्द्रीय सचिवालय सदस्य तथा १ नम्बर ब्युरो इन्चार्ज धमिलसहित झापा जिल्ला कमिटी सदस्य हेम आचार्यलाई फागुन १३ गते करिब २ बजे झापाबाट पक्राउ गरिएको उल्लेख गर्दै पार्टीले यस घटनालाई राजनीतिक प्रतिशोधको संज्ञा दिएको छ । न्यूनतम लोकतान्त्रिक अधिकारको समेत उल्लंघन भएको भन्दै गिरफ्तार नेताहरूलाई बिना शर्त रिहा गर्न माग गरिएको छ । यसैगरी, अन्य मित्र कम्युनिस्ट पार्टीका नेताहरूको गिरफ्तारीप्रति आपत्ति जनाउदैसम्पूर्ण राजनीतिक बन्दीहरूको सम्मानपूर्वक रिहाइ हुनुपर्ने पार्टीको भनाइ छ ।
साथै वक्तव्यमा पार्टीले स्थापना कालदेखि उठाउँदै आएका एजेन्डा र जनताको नाममा सञ्चालन गरिएको आन्दोलनका मुद्दाहरूलाई बेवास्ता गरिएको आरोप लगाएको छ । पुरानै व्यवस्था कायम राख्दै गरिएको निर्वाचनले मुलुकका विद्यमान समस्या समाधान गर्न नसक्ने दाबी गर्दै पार्टीले निकासविहीन चुनाव स्थगित गरी राष्ट्रिय सहमतिको सरकार गठन गर्नुपर्ने धारणा सार्वजनिक गरेको छ । पार्टीले संविधानले सुनिश्चित गरेको विचार तथा अभिव्यक्तिको स्वतन्त्रताको सम्मान गर्न सरकारसँग आग्रह गरेको छ । शान्तिपूर्ण राजनीतिक गतिविधिमा संलग्न व्यक्तिहरूमाथि दमन नगर्न चेतावनी दिँदै लोकतान्त्रिक अधिकारको रक्षा गर्न जोड दिएको छ ।