झापा, १४ फागुन । नेपाल कम्युनिष्ट पार्टी (बहुमत) ले आफ्नो पार्टीका ब्यूरो सदस्य तथा पाँचथर जिल्ला सचिव क. डिल्लिबहादुर कटुुवाललाई प्रहरीले गिरफ्तार गरेको घटनाप्रति गम्भीर आपत्ति जनाएको छ । १ नं. ब्युरो कार्यालय सचिव अनुपमद्धाराद्वारा जारी प्रेस वक्तव्यअनुसार कटुवाललाई फागुन १३ गते दिउँसो करिब २ बजे झापा जिल्ला बुद्धशान्ति गाउँपालिका–५, शान्तिनगरबाट संगठनात्मक काममा रहेका बेला पक्राउ गरिएको उल्लेख गरिएको छ । पार्टीले उक्त गिरफ्तारीलाई “अपहरण शैली” को संज्ञा दिदैं कडा शब्दमा निन्दा गरेको छ ।
वक्तव्यमा शान्तिपूर्ण रूपमा हिँडडुल गर्न पाउने, संघ–संगठनमा आबद्ध हुन पाउने जस्ता नैसर्गिक अधिकारको उल्लङ्घन गर्दै निर्दोष नागरिकलाई बिना कारण पक्राउ गर्नु निन्दनीय कार्य भएको बताइएको छ । पार्टीले वर्तमान सरकारमाथि राजनीतिक पूर्वाग्रहका आधारमा दमनकारी कदम चालेको आरोप लगाउँदै कटुवाललाई अविलम्ब रिहा गर्न सम्बन्धित निकायसँग जोडदार माग गरेको छ ।
रिहाइ नगरेमा उत्पन्न हुन सक्ने परिस्थितिको जिम्मेवारी सरकार स्वयंले वहन गर्नुपर्ने चेतावनी पनि वक्तव्यमा दिइएको छ । साथै, राज्य–आतङ्क तथा गैरन्यायिक गिरफ्तारीविरुद्ध सशक्त आवाज उठाउन मानवअधिकारकर्मी, पत्रकार, बुद्धिजीवी लगायत सम्पूर्ण न्यायप्रेमी समुदायसँग पार्टीले अपिल गरेको छ ।