चितवन — नेपाल कम्युनिष्ट पार्टी (बहुमत) चितवन जिल्ला समितिले शान्तिपूर्ण कार्यक्रमका क्रममा आफ्ना नेताको पक्राउप्रति गम्भीर ध्यानाकर्षण भएको जनाएको छ । पार्टीले फागुन २१ गतेका लागि घोषणा गरिएको कथित निर्वाचन बहिष्कार कार्यक्रमअन्तर्गत शान्तिपूर्ण रूपमा जनतामाझ आफ्ना धारणा राख्दै गर्दा जिल्ला सचिवालय सदस्य तथा अखिल नेपाल क्रान्तिकारी ट्रेड युनियन महासंघका केन्द्रीय कोषाध्यक्ष क. दिनेश घिमिरे (द्धन्द) लाई प्रहरीले पक्राउ गरेको जनाएको हो ।
जिल्ला सचिव सुमन श्रेष्ठद्वारा हस्ताक्षरित प्रेस वक्तव्यमा भरतपुर–१० चितवनबाट साँझ करिब ४ः३० बजे गरिएको पक्राउलाई गैरन्यायिक र राजनीतिक अधिकारमाथिको हस्तक्षेपका रूपमा व्याख्या गरिएको छ । वक्तव्यमा शान्तिपूर्ण राजनीतिक गतिविधिमा संलग्न व्यक्तिलाई पक्राउ गर्नु नागरिकको नैसर्गिक अधिकारमाथि कुण्ठा लगाउनु भएको उल्लेख गरिएको छ । पार्टीले उक्त घटनाको कडा शब्दमा निन्दा गर्दै पक्राउ परेका नेताको तत्काल रिहाइको माग गरेको छ । साथै, यस्ता गतिविधि दोहोरिए आन्दोलनका कार्यक्रम सशक्त बनाइने चेतावनीसमेत दिएको छ ।