काठमाडौं । नेपाल कम्युनिस्ट पार्टी (बहुमत) विदेश ब्युरोले इरानमाथि भएकोे अमेरिका–इजरायल संयुक्त सैन्य आक्रमणको कडा शब्दमा निन्दा गरेको छ । पार्टीको विदेश ब्युरो इन्चार्ज मुक्तिद्धाराद्वारा जारी प्रेस वक्तव्यमा उक्त आक्रमणलाई “साम्राज्यवादी हस्तक्षेप” को संज्ञा दिँदै विरोध जनाइएको हो । विज्ञप्ति अनुसार २८ फेब्रुअरी २०२६ मा अमेरिका र इजरायलले संयुक्त रूपमा इरान माथि हवाई आक्रमण गर्दा त्यहाँका सर्वोच्च नेता आयातोल्लाह अली खामेनी सहित सर्वसाधारण नागरिकको ज्यान गएको घटनालाई “नरसंहारकारी कदम” भन्दै घोर भत्र्सना गरिएको छ ।
वक्तव्यमा अमेरिकाले विगतमा जापानको हिरोसिमा र नागासाकीमा आणविक आक्रमण गरेको प्रसंग उल्लेख गर्दै हालको घटनालाई पनि त्यसकै निरन्तरता भएको आरोप लगाइएको छ । साथै, इरानविरुद्ध कुनै पनि प्रकारको आणविक हतियार प्रयोगको हल्ला फैलाएर मध्यपूर्वका प्राकृतिक स्रोतसाधनमाथि नियन्त्रण जमाउने प्रयास भएको दाबी गरिएको छ ।
पार्टीले अमेरिका र इजरायललाई सबै प्रकारका आक्रमण तुरुन्त बन्द गरी इरानका जनतालाई सुरक्षाको प्रत्याभूति गराउन माग गरेको छ । साथै, विश्वभरका साम्राज्यवाद विरोधी देश तथा संगठनहरूलाई अमेरिकी हस्तक्षेपको विरोध गर्न पनि अपिल गरिएको छ ।