काठमाडौं, फागुन २० । नेपाल कम्युनिस्ट पार्टी (बहुमत) ले वर्तमान राजनीतिक संकट समाधानका लागि तय नगरिएको भोली अर्थात फागुन २१ गतेको प्रतिनिधिसभा चुनाव खारेज गर्न आह्वान गरेको छ । पार्टीको केन्द्रीय समितिद्वारा आज जारी प्रेस वक्तव्यमा चुनावले मुलुकको गम्भीर राजनीतिक, आर्थिक तथा सामाजिक समस्याको समाधान दिन नसक्ने दाबी गर्दै वैकल्पिक राजनीतिक निकासको प्रस्ताव अघि सारिएको छ । वक्तव्यअनुसार दलाल पुँजीवादी संरचनाभित्र हुने चुनावले जनताको जनजीविकासँग सम्बन्धित आधारभूत प्रश्नहरू समाधान नगर्ने ठहर गरिएको छ । पार्टीले संविधानमा अग्रगामी परिवर्तन, सर्वपक्षीय राजनीतिक सम्मेलन र स्वाधीन संयुक्त सरकार गठनमार्फत मात्रै राजनीतिक स्थिरता, सामाजिक रूपान्तरण र राष्ट्रिय स्वाधीनता सुनिश्चित गर्न सकिने उल्लेख गरेको छ ।
पार्टीले विगतदेखि नै भ्रष्टाचार, बेथिति र कुशासनविरुद्ध संघर्ष गर्दै आएको दाबी गर्दै वर्तमान चुनावी प्रक्रियालाई “पुरानै सत्ताको निरन्तरता दिने अभ्यास” का रूपमा चित्रण गरेको छ । जनताको नाममा सत्तामा पुग्ने तर जनआकांक्षा पूरा नगर्ने प्रवृत्तिको अन्त्य गर्न व्यापक राजनीतिक पुनर्संरचना आवश्यक रहेको वक्तव्यमा भनिएको छ । अग्रगामी राजनीतिक शक्तिहरूबीच साझा कार्यक्रम र संयुक्त आन्दोलनमार्फत दलाल पुँजीवादी अधिनायकवादको अन्त्य गरी जनवादी लोकतन्त्र स्थापना गर्ने लक्ष्य पार्टीले दोहोर्‍याएको छ । साथै, भोली फागुन २१ मा हुने भनिएको चुनाव बहिष्कार गर्दै देशव्यापी प्रतिवादमा सहभागी हुन सम्पूर्ण देशभक्त, लोकतन्त्रप्रेमी तथा परिवर्तनकामी शक्तिलाई अपिल गरिएको छ ।
राजनीतिक विश्लेषकहरूका अनुसार पछिल्लो समय देशको राजनीतिक दिशा, शासन प्रणाली र जनजीविकाका मुद्दामा बहस तीव्र बन्दै गइरहेको सन्दर्भमा यस्तो आह्वानले आगामी दिनमा सडक संघर्षमा नयाँ राजनीतिक समीकरण र बहसलाई थप गति दिन सक्ने आकलन गरिएको छ ।