तेहरान । इरानले अमेरिका र इजरायलमाथि युद्धविरामसम्बन्धी सहमति उल्लंघन गरेको आरोप लगाउँदै वर्तमान परिस्थितिमा वार्ता र युद्धविरामको औचित्य समाप्त भएको जनाएको छ । इरानको संसद्का सभामुख मोहम्मद बागेर गालिबाफद्वारा जारी विज्ञप्तिमा इरानले प्रस्ताव गरेको दशबुँदे रूपरेखाका कम्तीमा तीन सर्त उल्लंघन भएको दाबी गरिएको छ । उक्त रूपरेखालाई अमेरिकाले वार्ताको आधारका रूपमा स्वीकार गर्ने प्रतिबद्धता जनाए पनि व्यवहारमा त्यसको पालन नभएको गालिबाफको आरोप छ । विज्ञप्तिमा अमेरिकामाथि पटक–पटक आफ्ना प्रतिबद्धता तोड्ने प्रवृत्ति दोहोरिएको उल्लेख गर्दै इरानले यसप्रति गम्भीर असन्तुष्टि प्रकट गरेको छ । गालिबाफका अनुसार वार्ताको प्रारम्भिक आधार नै उल्लंघन भइसकेको अवस्थामा द्विपक्षीय संवाद वा युद्धविरामको कुनै सार्थकता रहँदैन ।
यसैबीच, लेबनानमा इजरायली आक्रमण जारी रहनु युद्धविरामको शर्तविपरीत भएको इरानको भनाइ छ । इरानले लेबनानमा तत्काल युद्धविराम लागू हुनुपर्ने अडान दोहोर्‍याएको छ । यसअघि मध्यस्थकर्ताको भूमिका निर्वाह गर्दै आएका पाकिस्तानका प्रधानमन्त्री सहबाज शरीफले पनि लेबननसहित तनावग्रस्त क्षेत्रहरूमा तत्काल युद्धविराम कार्यान्वयन गर्नुपर्ने आवश्यकता औंल्याएका थिए ।