तेहरान । इरानले अमेरिका र इजरायलको आक्रमणका कारण ठूलो आर्थिक क्षति व्यहोरेको दाबी गर्दै प्रारम्भिक रूपमा करिब २७० अर्ब अमेरिकी डलर बराबरको नोक्सानी भएको जनाएको छ । संयुक्त राष्ट्र संघका लागि तेहरानका राजदूतले मंगलबार इरानमाथि आक्रमणका लागि आफ्नो भूमि प्रयोग गर्न दिएका पाँच क्षेत्रीय देशबाट उक्त क्षतिपूर्ति असुल गर्नुपर्ने बताएका छन् । इरानले ‘स्ट्रेट अफ हर्मुज प्रोटोकल’ मार्फत पनि क्षतिपूर्ति उठाउने विकल्प अघि सारेको छ । यस प्रस्तावअन्तर्गत हर्मुज जलडमरूबाट गुज्रिने जहाजहरूबाट कर उठाउने योजना समावेश गरिएको छ ।
इरानी सरकारकी प्रवक्ता फतेमेह मोहजेरानीका अनुसार फेब्रुअरी २८ देखि सुरु भएको अमेरिका–इजरायल आक्रमणपछि प्रत्यक्ष तथा अप्रत्यक्ष रूपमा यो क्षति भएको प्रारम्भिक आकलन गरिएको हो । मोहजेरानीले रुसी समाचार एजेन्सी ‘आरआइए नोवोस्ती’सँगको अन्तर्वार्तामा उक्त विवरण सार्वजनिक गरेकी हुन् । यद्यपि उनले यो प्रारम्भिक तथ्यांक मात्र भएको र विस्तृत विवरण पछि सार्वजनिक गरिने बताएकी छन् ।