रोल्पा । रोल्पा जिल्लामा भएको जीप दुर्घटनामा २० जनाको ज्यान गएको छ । जलजल क्षेत्रमा घुम्न गएका पर्यटक बोकेको जीप दुर्घटनामा परेपछि ठूलो मानवीय क्षति भएको हो । दुर्घटनापछि नेपाल कम्युनिस्ट पार्टी (बहुमत) का प्रवक्ता दीपकद्धारा जारी प्रेस वक्तव्यमा घटनाप्रति गहिरो दुःख व्यक्त गरिएको छ । पार्टीले मृतकप्रति श्रद्धाञ्जली अर्पण गर्दै शोकसन्तप्त परिवारजनप्रति समवेदना प्रकट गरेको जनाएको छ । वक्तव्यमा घाइतेहरूको शीघ्र स्वास्थ्य लाभको कामना गरिएको छ । साथै, घाइतेहरूको उपचारका लागि उचित व्यवस्था गर्न र पीडित नागरिकलाई राहत उपलब्ध गराउन सरकारसँग माग गरिएको छ ।