काठमाडौं, १७ जेठ । नेपाल कम्युनिस्ट पार्टी (बहुमत) ले प्रधानमन्त्री बालेन्द्र साहद्वारा नेपालले भारतको भूमि मिचेको भन्ने अभिव्यक्तिप्रति गम्भीर आपत्ति जनाएको छ । पार्टीले उक्त अभिव्यक्तिलाई तथ्यहीन, गैरजिम्मेवार तथा कूटनीतिक मान्यता विपरीत भएको आरोप लगाएको छ । पार्टीको केन्द्रीय समितिद्वारा जारी प्रेस वक्तव्यमा नेपालतर्फबाट भारतीय भूमि मिचिएको भए त्यसबारे तथ्यसहित नेपाली जनतालाई स्पष्ट पार्न माग गरिएको छ । साथै नेपाली भूभाग लिपुलेक, लिम्पियाधुरा तथा दक्षिण सीमाका विभिन्न क्षेत्रमा भारतद्वारा हुँदै आएको अतिक्रमणबारे कूटनीतिक पहल गर्नुको सट्टा विषयान्तर हुने अभिव्यक्ति आएको भन्दै दुःख व्यक्त गरिएको छ ।
वक्तव्यमा प्रधानमन्त्रीको भनाइलाई नेपाली जनताको स्वाभिमान र नेपालको सार्वभौमिकताविरुद्धको “देशद्रोही अभिव्यक्ति” को संज्ञा दिँदै उक्त अभिव्यक्ति फिर्ता लिन तथा प्रधानमन्त्रीलाई बर्खास्त गर्न माग गरिएको छ । यस विषयमा विरोध जनाउँदै पार्टीले आन्दोलनका कार्यक्रमसमेत सार्वजनिक गरेको छ । सार्वजनिक कार्यक्रमअनुसार १८ जेठमा कोणसभा र २० जेठमा मशाल जुलुस आयोजना गरिने जनाइएको छ ।