काठमाडौँ । एकीकृत दलित मुक्ति मोर्चा नेपालले माघ २२ गते नयाँ पत्रिकामा अन्तरजातीय प्रेम बिवाह गर्ने दलित युवामाथि गृहमन्त्रीकै निर्देशनमा अत्याचार भन्ने शिर्षकमा प्रकाशित समाचारले मोर्चाको गम्भीर ध्यानाकर्षण भएको भन्दै मानवता विरोधी निच व्यापारी सुरेन्द्र रौनियारको खेताला कथित गृहमन्त्री र प्रहरी प्रशासनको निच हर्कतको घोर निन्दा एवम् भत्र्सना गरेको छ ।

नेकपा (बहुमत) निकट एकीकृत दलित मुक्ति मोर्चा नेपालका संयोजक दर्शन कुमार नेपालीले बुधबार प्रेस विज्ञप्तिमार्फत निस्वार्थ प्रेम सम्बन्धलाई वैवाहिक जीवनमा कायम गरेका नेहा र सत्येन्द्रको जीवन रक्षाको लागि सम्बन्धित सरोकारवाला पक्षहरुलाई जिम्मेवार बन्न अनुरोध गरेका छन् । साथै उनले राज्य शक्तिको दुरुपयोग गर्दै जातीय विभेद गर्ने सुरेन्द्र रौनियारलाई गिरफ्‌तार गरी कारवाही गर्न मागसमेत गरेका छन् ।

दलित समुदाय र निज नेहा र सत्येन्द्र राममाथि कुनै पनि प्रकारको मानसिक, शारीरिक, सामाजिक रुपमा आँच पुग्ने कार्य नगर्न निच सुरेन्द्र रौनियार र अन्य मतियारहरुलाई संयोजक नेपालीले चेतावनी दिएका छन् ।

निस्वार्थ प्रेम सम्बन्धलाई वैवाहिक जीवनमा कायम गर्दै सामाजिक साँस्कृतिक रुपान्तरणसहित सहज जीवनयापन गर्न खोज्ने जोडिको विरुद्धमा षड्यन्त्र, घुसपैठ गर्दै सामाजिक विखण्डनको मतियार जात व्यवस्थाको आवरणमा गरिएको कथित राज्य शक्तिको दुरुपयोगले एकात्मक राज्यसत्ताको चरित्र सतहमा आएको प्रेस विज्ञप्तिमा उल्लेख गरिएको छ ।

जातीय विभेदमा संलग्नलाई संरक्षण गरेर सरकारले पीडितलाई अत्याचार गरेको भन्दै देशभर गृहमन्त्री रमेश लेखकको राजीनामाको मागसहित विरोध प्रदर्शन भइरहेको छ ।