काठमाडौं । इजरायलले इरानमाथि हमला गरेको छ । पेलेष्टिनी लडाकू समूह हमाससितको लडाइँ जारी रहेकै बेला इजरेलले इरानमाथि पनि हमला बोलेको छ ।

लेबनानको हिजबुल्लाह र यमनका हुथीहरुसित पनि इजरेल लडिरहेको छ । तर यसपालिको इरानमाथिको हमला भने इजरेललाई भारी पर्नेछ । इरानमाथिको हमलासँगै इजरायलका रक्षामन्त्री इजरायल काट्जले देशमा संकटकाल घोषणा छन् ।

इरानी सरकारी सञ्चारमाध्यम आईआरएनएका अनुसार तेहरानमा लगातार विस्फोटहरूको आवाज सुनिएको छ । इजरायलको प्रारम्भिक हमला मुख्यतया इरानको आणविक कार्यक्रम र लामो दूरीका क्षेप्यास्त्र क्षमतामाथि लक्षित गरिएको इजरायली सैन्य अधिकारीले जानकारी दिएका छन् । क्षतिको विवरण भने आइसकेको छैन । इजरेली हमलाको जवाफ इरानले कसरी दिनेछ त्यो केही समय पर्खनै पर्छ ।

उक्त हमला ‘सटीक र समन्वित आक्रमण’ भएको बताइएको छ, जसमा इरानका विभिन्न क्षेत्रमा रहेका ‘दर्जनौँ लक्ष्यहरू’ समेटिएको छ । इजरायलले इरानमाथि यस्ता हमलाहरू क्रमशः जारी राख्ने योजना बनाएको पनि एक इजरायली स्रोतले सीएनएनलाई बताएका छन् ।

‘यो केवल एक दिनको हमला होइन,’ स्रोतले भने। इजरायली सरकारले यो हमला गर्न सैन्य तथा कूटनीतिक रूपमा उपयुक्त समय देखेको भन्दै, यही अवसर प्रयोग गरेर कारबाही थालिएको जनाइएको छ । इरानको सरकारी टेलिभिजनले इजरायलले शुक्रबार बिहान गरेको आक्रमणमा तेहरानस्थित ‘इस्लामिक रिभोलुसनरी गाड्र्स’ को मुख्यालयलाई पनि लक्षित गरिएको जानकारी दिएको छ । स्थानीय सञ्चारमाध्यमहरूले उक्त स्थानमा आगो र धुवाँ निस्किएको देखिएको प्रत्यक्षदर्शीहरूको हवाला दिँदै जनाएका छन् ।

इस्लामिक रिभोलुसनरी गार्डस इरानको सशस्त्र बल अन्तर्गतको एउटा बलियो र प्रभावशाली शाखा हो, जसले देशको आन्तरिक सुरक्षा, विदेश नीति र आणविक कार्यक्रममा समेत गहिरो प्रभाव राख्छ ।

सञ्चारमाध्यमका अनुसार इजरायली मिसाइलले तेहरान र अन्य सहरका आवासीय क्षेत्रहरूमा पनि प्रहार गरेका छन् । रोयटर्सले इरानी टेलिभिजनलाई उद्धृत गर्दै मारिनेहरूमा बालबालिका पनि रहेको जनाएको छ । इरानमाथिको इजरेली हमलाले मध्यपूर्वमा युद्धको आगो सल्किएको र अब कि इरान समाप्त हुनेछ, कि इजरेल खरानी हुने विश्लेषण भइरहेको छ ।