काठमाडौं । नेपाली कांग्रेसका नेता तथा पूर्वमन्त्री मोहमद आफताब आलमलाई अदालतबाट सफाई दिएको आरोपमा २ जना न्यायाधीशलाई कालोमोसो दलेको नेकपा (बहुमत)ले काठमाडौंको माइतीघरमा प्रदर्शन पनि गरेको छ ।

न्यायाधीश द्धय खुशीप्रसाद थारु र अर्जुन महर्जनलाई शुक्रबार मात्र सो पार्टीले कार्यकक्षमै कालोमोसो दलेको थियो । त्यसक्रममा पक्राउ परेका आफ्‌ना केन्द्रीय नेताहरु अविनाश, पदम र सिराहा जिल्ला सचिवालय सदस्य गर्भू महतोको रिहाइको माग गर्दै आज माइतीघरमा प्रदर्शन गरिएको नेता कृष्ण सेवाले जानकारी दिए ।

भ्रष्ट न्यायाधीश थारु र महर्जनले गरेको फैसलाको विरुद्धमा र उनीहरुलाई कालोमोसो दलिएको समर्थमा आज प्रदर्शन गरिएको पनि नेता सेवाले जनाए । प्रदर्शनका क्रममा आज गिरफ्‌तार गरिएका आफ्‌नो पार्टीका नेताहरु उषाकिरण आजाद, विद्यार्थी नेता हरि विष्ट, युवा नेता झलक विश्वकर्मा लगायत ७ जनालाई पक्राउ गरिएको छ ।

आज पक्राउ परेकाहरुलाई पनि तत्काल रिहा गर्न माग गरिएको छ । आजको प्रदर्शन सो पार्टीको ३ नम्बर ब्यूरोको आयोजनामा भएको हो ।

यता बहुमत पार्टीका महासचिव कञ्चनले एक विज्ञप्तिमार्फत् कांग्रेस नेता मोहमद अफताव आलमलाई सफाई दिने न्यायाधीशहरुलाई जनसहभागितामै कालोमोसो दलेर सांकेतिक कारावाही गरिएको र गिरफ्तार परेका आफ्ना नेता कार्यकर्ताहरुलाई तत्काल रिहा गर्न माग गरेका छन् ।

विज्ञप्तिमा महासचिव कञ्चनले इटहरीमा मानिसलाई जिउँदै जलाएर हत्या गरेको आरोपमा जेलमा रहेका कांग्रेस नेता आलमलाई सफाई दिने न्यायाधिशहरु खुसीराम थारू र अर्जुन महर्जनलाई कालोमोसो दलेर जनाकाराही गरेको जनाएका छन् ।