काठमाडौं । इरानी संसदका सभामुख मोहम्मद बाघेर घालिबाफले इजरायलमाथि इस्लामिक गणतन्त्रमा शासन परिवर्तन गराउने प्रयास गरेको आरोप लगाएका छन् । उनले इजरायलले देशभित्र अशान्ति फैलाउने र आन्तरिक घुसपैठमार्फत सरकारलाई अस्थिर पार्ने रणनीति अपनाएको दाबी गरे ।

‘तेहरानका सडकहरूमा जनता उतारेर इस्लामिक शासन प्रणाली अन्त्य गर्ने ४० वर्षे सपना पूरा गर्नसक्छु भन्ने इजरायलले सोचेको हुनुपर्छ,’ घालिबाफले संसदमा सम्बोधन गर्दै भने, ‘तर जनताको इच्छाशक्ति र नेतृत्वको दृढताले त्यो योजना असफल बनायो ।’

सभामुख घालिबाफले इजरायलका आक्रमणहरू केवल सैन्य सीमामा सीमित नरही, देशभित्रै घुसपैठ गरी सामाजिक अस्थिरता निम्त्याउने किसिमको रहेको बताए ।

इरान–इजरायल सम्बन्धमा जारी तनावबीच आएको उक्त अभिव्यक्तिलाई तेहरानले ‘सावधानीको सन्देश’का रूपमा लिएको छ ।