तेहरान । इरानले अमेरिकाले बम हान्ने सूचना पाएपछि आफ्ना ३ वटा परमाणु केन्द्र खाली गरिएकोले खासै क्षति नभएको बताएको छ । कारखानाका सामग्रीहरु अन्तै सारिएकोले विकीरण फैलिने डर नभएको पनि इरानले जनाएको छ ।

इरानको सरकारी टेलिभिजनका अनुसार हमलाको पूर्वसन्ध्यामा तीनवटै परमाणु केन्द्रहरू खाली गरिएका थिए । सरकारी च्यानलका राजनीतिक ब्यूरो उपनिर्देशक हसन अबेदिनीले भनेका छन्, ‘ट्रम्पले भनेजस्तो आक्रमण भएको हो भने पनि इरानले त्यसबाट कुनै खास क्षति व्यहोर्नुपरेको छैन । सामग्रीहरू पहिले नै स्थानान्तरण गरिसकिएको थियो ।’

तस्नीम समाचार एजेन्सीका अनुसार कौम प्रान्तको व्यवस्थापन शाखाका प्रवक्ता मोर्तज हैदरीले बताए अनुसार फोर्दो केन्द्रको केही भाग हवाई आक्रमणमा परेको छ । इस्फहानका सुरक्षा उप–गभर्नर अकबर सलेहीले भनेका छन्, ‘नन्ताज र इस्फहान क्षेत्रमा धेरै विस्फोटका आवाज सुनिएका छन् ।’