असार ९– पूर्वाञ्चल विश्वविद्यालय अन्तर्गत इन्जिनियरिङ्ग संकायको परीक्षा प्रणालीमा देखिएको गम्भीर अनियमितता विरुद्ध अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी) पूर्वाञ्चल विश्वविद्यालय समितिले प्रेस विज्ञप्ति जारी गर्दै तत्काल छानबिन र दोषीमाथि कारबाहीको माग गरेको छ ।
गत असार २ गते विराटनगर–२ स्थित विश्वविद्यालय अन्तर्गतको पोष्टर ग्राजुएट क्याम्पसमा आइटी विषयको मिड–टर्म परीक्षा समयमा एकजनाले गार्डलाई घुसस्वरूप ५० हजार रुपैयाँ दिएर उत्तरपुस्तिका फेर्ने कार्य गराएको आरोप लागेको छ । उक्त व्यक्तिले मोटरसाइकलबाट उत्तरपुस्तिका लिएर गेटबाहिर फाल्ने प्रयास गरेका थिए भन्ने घटनाले विद्यार्थी संगठनको ध्यान खिचेको छ ।
अध्यक्ष सुप्रिया नेपालीद्धारा जारी विज्ञप्तिमा भनिएको छ, “छानबिनका क्रममा उक्त उत्तरपुस्तिका क्याम्पस बाहिर फालिएको पुष्टि भएको छ भने कर्मचारीको संलग्नता देखिन्छ । परीक्षा प्रणालीमा यस्तो धाँधली विश्वविद्यालयको गरिमामा आँच ल्याउने र विद्यार्थीको भविष्यसँग खेलवाड गर्ने कार्य हो” ।
अखिल (क्रान्तिकारी)ले घटनाको गम्भीरता बुझेर सत्य, तथ्य र निष्पक्ष छानबिन गरी दोषीलाई कारबाही गर्न माग गरेको छ । विज्ञप्तिमा थप चेतावनी दिइएको छः “यदि क्याम्पस प्रशासनले समयमै कारबाहीको प्रक्रिया अघि बढाएन भने हामी कठोर संघर्षमा उत्रिनेछौं ।”