नेपालमा जनपक्षीय पत्रकारिताको त्यति धेरै लामो इतिहास छैन, यद्यपि यसबिचमा यो क्षेत्रका माध्यमबाट जे जति काम भएका छन्, ती महत्वपूर्ण भए पनि पर्याप्त छैनन् । यति बेला देशको परिस्थिति गम्भीर दिशातर्फ उन्मुख छ । राज्य सञ्चालकहरू अत्यन्त गैरजिम्मेवार बनिरहेका छन् । यस्तो बेलामा हामीले जनपक्षीय पत्रकारिताको माध्यमबाट देश र जनताको पक्षमा काम गर्ने सदाशयताका साथ हामीले यो यात्रा प्रारम्भ गरेका छौँ ।

देश र जनताका प्रत्यक्ष सरोकारका विषयलाई उजागर गरी सचेतना जगाउने र जन–उत्तरदायी एवम् मर्यादित पत्रकारितामार्पmत समतामूलक समाज निर्माणको आधार तयार गर्ने उद्देश्यसहित जन मेल प्रा.लि.द्वारा सञ्चालित जनमेल साप्ताहिक पत्रिका नियमित प्रकाशन गर्ने गरी हामी आएका छौँ । वर्तमान नेपालको राष्ट्रिय सङ्कट, देशको स्वाधीनतामाथिको चौतर्फी जोखिम, संस्थागत भ्रष्टाचार, कालोबजारी, अनियन्त्रित महँगी, राज्यको बढ्दो ऋण, जनताको गिर्दो आर्थिक अवस्था, लाखौँ युवा र विद्यार्थीहरूको पलायन, असन्तुलित व्यापार घाटा, वित्तीय शोषण र राज्यसत्ताका उपरिसंरचनामा भएका चरम अनियमितबारेमा निरन्तर प्रकाशन/प्रसारण गरी जनतालाई सूसुचित एवम् सचेतना जगाउने कार्य नै हाम्रो वास्तविक अभीष्ट हुनेछ । यसका साथै, राज्यका अवयवहरूले देश र जनतामाथि गर्ने अन्याय, अत्याचार र विभिन्न खालका उत्पीडनको पर्दाफास गर्ने र यस प्रकारको प्रणालीको विकल्पमा यथोचित राज्य प्रणालीबारे बहस चलाउने सन्दर्भ पनि हाम्रो जिम्मेवारीभित्र नै पर्नेछ ।

आशा छ, यो खबरले तपाईंहरूलाई गर्व र खुसीको अनुभूति अवश्य दिलाउनेछ । प्रकाशनमा देश र जनताका विषयसँगै आवाजविहीनहरूका आवाजहरूलाई हामी हाम्रो प्रमुख प्राथमिकतामा राख्नेछौँ । अब प्रश्न मात्र गर्ने र उत्तर नखोज्ने पवृत्तिबाट हामी पूर्ण रूपमा अलग भई हामीले उठाएका विषयमा उत्तरसहित प्रस्तुत हुनेछौँ । देशका कुनाकाप्चामा रहेका कैयौँ विषयलाई देशसँग जोड्नेछौँ, नेपाली डायस्पोरालाई नेपालसँग जोड् नेछौँ । साथै, देशको प्रगति र समृद्धिका लागि हामी निरन्तर हाम्रा प्रसारण सामाग्री प्रस्तुत गर्नेछौँ । यो एक प्रकारको अभियानमुखी पत्रकारिता हुनेछ । तसर्थ, यहाँहरूबाट सदैव सकारात्मक सहयोगको अपेक्षा गरेका छौँ । देश र जनताका विषयमा हामी सबैसँग सहकार्य र सहयात्रा गर्न तयार छौँ ।