दार्चुला । नेपाल कम्युनिस्ट पार्टी (बहुमत) जिल्ला समिति दार्चुलाले नजिकिँदै गरेका चाडपर्वलाई लक्षित गर्दै बजारमा हुन सक्ने कालोबजारी, कृत्रिम अभाव, मूल्यवृद्धि, मदिरा तथा लागुऔषधको अवैध कारोबार र यातायात क्षेत्रमा हुने मनपरी नियन्त्रण गर्न माग गरेको छ । पार्टीले जिल्ला प्रशासन कार्यालय दार्चुलालाई ज्ञापनपत्र बुझाउँदै सर्वसाधारणको दैनिक जीवनसँग जोडिएका समस्याको समाधानका लागि सम्बन्धित निकायलाई जिम्मेवार भएर काम गर्न आग्रह गरेको हो । ज्ञापनपत्रमा चाडपर्वका बेला बजारमा कृत्रिम अभाव सिर्जना गर्ने, मनपरी मूल्य बढाउने तथा म्याद गुज्रिएका र गुणस्तरहीन वस्तु बिक्री गर्ने गतिविधि नियन्त्रण गर्न प्रभावकारी बजार अनुगमन गर्नुपर्ने उल्लेख गरिएको छ । उपभोक्तालाई ठगी गर्ने व्यापारीमाथि कारबाही गर्न पनि पार्टीले माग गरेको छ ।
त्यसैगरी, अवैध रूपमा मदिरा बिक्रीवितरण, लागुऔषधको कारोबार तथा सेवन र जुवातासजस्ता विकृतिजन्य गतिविधिले सामाजिक शान्ति, सुरक्षा र सद्भावमा नकारात्मक असर पार्न सक्ने भन्दै यस्ता गतिविधि नियन्त्रण गर्न विशेष पहल गर्नुपर्ने ज्ञापनपत्रमा उल्लेख छ । चाडपर्वका समयमा हुन सक्ने झैझगडा, हिंसा तथा अन्य आपराधिक गतिविधि रोक्न आवश्यक सुरक्षा व्यवस्था मिलाउन पनि माग गरिएको छ । सीमावर्ती क्षेत्रका सर्वसाधारणले दैनिक उपभोग्य सामग्री घरायसी प्रयोजनका लागि ल्याउँदा भन्सारसम्बन्धी नियमको पालना हुने गरी सहज, सरल र पारदर्शी व्यवस्था गर्न पार्टीले आग्रह गरेको छ । अनावश्यक झन्झट हटाई सर्वसाधारणलाई सहज रूपमा सामग्री ओसारपसार गर्ने वातावरण बनाउनुपर्ने उसको माग छ ।
यातायात क्षेत्रको अनियमितताप्रति ध्यानाकर्षण गराउँदै पार्टीले चाडपर्वको मौका छोपी सार्वजनिक यातायातमा मनपरी भाडा असुल्ने र क्षमताभन्दा बढी यात्रु बोक्ने कार्य तत्काल नियन्त्रण गर्नुपर्ने जनाएको छ । सवारीसाधनको नियमित अनुगमन, चालकको जिम्मेवारी सुनिश्चितता तथा प्रचलित नियम उल्लङ्घन गर्नेहरूमाथि कारबाही गर्न पनि माग गरिएको छ । सम्भावित सडक दुर्घटना न्यूनीकरणका लागि सवारीसाधनको अवस्था जाँच गर्ने, चालकको लापरबाही नियन्त्रण गर्ने र यात्रुको सुरक्षालाई प्राथमिकता दिँदै व्यवस्थित यातायात सेवा सञ्चालन गर्नुपर्ने ज्ञापनपत्रमा उल्लेख छ । पार्टीका जिल्ला सचिव क. विजयले ज्ञापनपत्रमार्फत उठाइएका मागलाई गम्भीरतापूर्वक लिई तत्काल आवश्यक पहल र कार्यान्वयन गर्न सम्बन्धित निकायको ध्यानाकर्षण गराएका छन् ।