पाँचथर । नेपाल कम्युनिस्ट पार्टी (बहुमत) का १ नम्बर ब्यूरो सदस्य तथा पाँचथर जिल्ला सचिव डिल्लीबहादुर कटुवाललाई प्रहरीले गिरफ्तार गरेको छ। हिजो राति ९ बजे तिर आफ्नै घरमा बसी रहेका बेला प्रहरीले अपहरण शैलीमा गिरफ्तार गरेको भन्दै नेकपा(बहुमत)ले कडा आपत्ति जनाएको छ।

पार्टीका अनुसार कटुवाललाई चैत्र ७ गते राति करिब ९ बजे आफ्नै घरमा परिवारसँग बसिरहेका बेला साधा पोशाकका प्रहरीहरू आएर गिरफ्तार गरेका थिए। पार्टीले विज्ञप्ति जारी गर्दै बिना कुनै कारण रातको समयमा साधा पोशाकका प्रहरी पठाएर गिरफ्तार गर्नु गैर-कानूनी र निन्दनीय कार्य भएको जनाएको छ।

“शान्तिपूर्ण रूपमा हिँडडुल गर्न पाउने, आफ्नो विचार अभिव्यक्त गर्न पाउने तथा संघ-संगठनमा आबद्ध हुने संवैधानिक हकको ठाडो उल्लंघन गरिएको छ। सरकारले लोकतान्त्रिक अधिकारमाथि दमन गर्दै जाने हो भने यसका गम्भीर परिणाम आउन सक्छन्,” विज्ञप्तिमा उल्लेख छ।

संवैधानिक अधिकारको उल्लंघन भएको पार्टीको आरोप

पार्टीले कटुवालको गिरफ्तारीलाई गैरन्यायिक भन्दै सरकारको आलोचना गरेको छ। “संविधानले नै नागरिकलाई स्वतन्त्र रूपमा संगठित हुने, विचार अभिव्यक्त गर्ने र निष्पक्ष रूपमा राजनीतिक गतिविधि सञ्चालन गर्ने अधिकार दिएको छ। तर, सरकारले मनोमानीपूर्ण रूपमा हाम्रो नेताहरूलाई गिरफ्तार गरेर दमनको नीति अवलम्बन गरिरहेको छ,” विज्ञप्तिमा भनिएको छ।

पार्टीले पाँचथर प्रहरीले कटुवाललाई तत्काल रिहा गर्नुपर्ने माग गर्दै अन्यथा थप संघर्ष चर्काउने चेतावनी दिएको छ। “यदि कटुवाललाई रिहा नगरिएमा सरकारकै दमनकारी नीति विरुद्ध जनस्तरबाट सशक्त आन्दोलनको घोषणा गरिनेछ। यसको सम्पूर्ण जिम्मेवारी वर्तमान संसदीय दलाल पुँजीवादी सरकारलाई नै जान्छ,” पार्टीले स्पष्ट पारेको छ।

मानव अधिकार उल्लंघनको विषयमा चेतावनी

नेकपाले कटुवालको गिरफ्तारीलाई राज्य आतङ्कको संज्ञा दिँदै मानव अधिकार संगठनहरू, पत्रकार, बुद्धिजीवी तथा न्यायप्रेमी नागरिकहरूलाई यसविरुद्ध आवाज उठाउन अपील गरेको छ। “सरकार निरंकुशतातर्फ उन्मुख भइरहेको छ। हामी सम्पूर्ण मानव अधिकारवादीहरूलाई अपील गर्दछौं कि, गैरन्यायिक गिरफ्तारी तथा राज्य दमनका विरुद्ध सशक्त रूपमा प्रतिरोध गरियोस्,” विज्ञप्तिमा भनिएको छ।

प्रहरीको औपचारिक प्रतिक्रिया आउन बाँकी

यस घटनासम्बन्धी प्रहरीले औपचारिक धारणा सार्वजनिक गरिसकेको छैन। कटुवाललाई कुन कारणले गिरफ्तार गरिएको हो भन्ने विषयमा अझै खुलासा गरिएको छैन। पाँचथर प्रहरी कार्यालयमा यस विषयमा बुझ्न खोज्दा कुनै पनि अधिकारीले प्रतिक्रिया दिन मानेका छैनन्।