महेन्द्रनगर । नेकपा बहुमतका महासचिव कञ्चनले संसदीय व्यवस्था असफल भएको ठोकुवा गरेका छन्। उनले ०८४ को निर्वाचन समाजवादी व्यवस्थाका लागि मात्रै हुने दाबी गर्दै वर्तमान संसदीय प्रणालीले जनताको समस्या समाधान गर्न नसक्ने बताएका छन्।

आइतबार कञ्चनपुरको महेन्द्रनगरमा ‘भ्रष्ट दलाल पुजिवादी व्यवस्थाका विरुद्ध जनसंघर्ष अभियान’को उद्घाटन गर्दै महासचिव बास्तोलाले भने- ‘आगामी निर्वाचन संसदीय व्यवस्थाका लागि हुँदैन, भए समाजवादी व्यवस्थाका लागि मात्रै हुन्छ, संसदीय व्यवस्था असफल भयो, अब सबै दलले वैज्ञानिक समाजवादी व्यवस्थाका लागि चुनावमा सहभागी हुनुपर्छ।’

त्यतै उनले देशको कार्यकारी प्रमुखलाई प्रत्यक्ष निर्वाचित गर्ने प्रणाली अवलम्बन गर्नुपर्ने आवश्यकता औंल्याएका छन्। उनले भने, “जनताको मतबाट सिधै सरकार प्रमुख चयन हुने व्यवस्था भए मात्र स्थायित्व आउन सक्छ।”

संसदीय व्यवस्थाकै कारण जनप्रतिनिधिदेखि प्रधानमन्त्री, मन्त्रीहरू भ्रष्ट भइरहेको दाबी गर्दै उनले प्रधानमन्त्री केपी शर्मा ओलीले कम्बोडियामा रकम राखेको भारतीय मिडियामा आएका विषयबारे प्रस्ट पार्नुपर्ने माग गरे। उनका अनुसार अबको आन्दोलन संसदबाट होइन, जनताबाट तय हुने छ।