बेइजिङ, नोभेम्बर २ (एजेन्सीको सहयोगमा) — चीन र रूसले आपसी लगानी सहकार्यलाई अझ मजबुत बनाउने प्रतिबद्धता जनाएका छन् । शनिबार बेइजिङमा सम्पन्न चीन–रूस लगानी सहकार्य समितिको १२औँ बैठकमा दुबै देशका उच्च अधिकारीहरूले लगानी सम्बन्धलाई नयाँ उचाइमा पुर्‍याउने संकल्प व्यक्त गरे । बैठकको सह–अध्यक्षता चीनका उपप्रधानमन्त्री तथा चिनियाँ कम्युनिष्ट पार्टी (सीपीसी) केन्द्रीय समितिका राजनीतिक ब्यूरो स्थायी समितिका सदस्य डिङ स्युएक्सियाङ र रूसी पहिलो उपप्रधानमन्त्री डेनीस म्यान्टुरोभले संयुक्त रूपमा गरे । उपप्रधानमन्त्री डिङले चीन र रूसबीचको लगानी सहकार्य गत वर्ष उल्लेखनीय रूपमा अगाडि बढेको बताउँदै त्यसलाई अझ गहिरो र प्रभावकारी बनाउने चार बुँदे प्रस्ताव प्रस्तुत गरे। ती प्रस्तावमा मुख्य क्षेत्रहरूमा ध्यान केन्द्रित गर्दै ठोस नतिजा दिने परियोजनाहरू अघि बढाउने, दुवै देशबीच सञ्चार र समन्वय सुदृढ गर्ने, आपूर्ति–माग मिलानमा सुधार ल्याउने र व्यवसायिक वातावरण सुधार गरी लगानीकर्ताको आत्मविश्वास बढाउने विषय समावेश छन् ।
“राष्ट्रप्रमुखहरूको रणनीतिक निर्देशनअनुसार चीन रूससँग मिलेर लगानी सहकार्यको गुणस्तर र दक्षता निरन्तर बढाउन इच्छुक छ,” डिङले भने । “यसले नयाँ युगको लागि चीन–रूस व्यापक रणनीतिक साझेदारीलाई अझ समृद्ध बनाउनेछ र दुवै देशका जनताको हितमा योगदान पुर्‍याउनेछ ।” रूसी उपप्रधानमन्त्री म्यान्टुरोभले पनि लगानी सहकार्य समितिको नेतृत्व र समन्वय भूमिकालाई सशक्त बनाउने प्रतिबद्धता जनाए । उनले निष्पक्ष र पारदर्शी व्यवसायिक वातावरण विकास गर्न, प्रमुख परियोजनाहरूलाई क्रमिक रूपमा अघि बढाउन र नयाँ आर्थिक वृद्धि क्षेत्रहरू प्रवद्र्धन गर्न रूस तयार रहेको बताए ।