ए प्रिय माली

तिमिले

बगैंचाको गोडमेल

र

कलिला मुनाहरुको स्याहार गर्ने पो हो त,

हुर्कदै गरेका मुनाहरु र

फक्रीदै गरेका फुलहरुलाई

निमोठेर फाल्न पाईन्छ र ?

बगैंचाबाट उखेलेर फाल्ने

झारपात पो होला त

उल्टै

हुर्किने लागेका विरुवाहरुको

कत्लेआम गर्न पाईन्छ र ?

हेर…

उजाड मरुभूमिको

निरस मालिक बन्नु भन्दा

सुन्दर फुलबारीको

माली बन न प्रिय,

बरु त्यो फुलबारीमा

म पनि फुलेर

मगमग बास्ना छरि दिउँला !

प्रिय म चाहन्छु

तिम्रो हातले फुलहरु रोपुन,

झारपातहरु उखेर फालुन,

फक्रीनै नपाएका कोपिलाहरुलाई

चुँडालेर नफालुन !

तिम्रो नजरमा

दृष्टि दोष भएछ कि कतै

फुलहरुलाई झारपात देख्ने,

झारपातहरुलाई फुल देख्ने,

एकपल्ट गहिरिएर सोचिदेउन न प्रिय

यो मेरो अन्तिम अनुरोध र आग्रह हो,

अन्यथा

फुलहरुको विद्रोहले

काँडा भन्दा नि बढी बिजाउनेछ !!