काठमाडौं । इरानले हमला गर्ने डरले अमेरिकाले कतारमा रहेका आफ्ना ४० वटा सैन्य विमान त्यहाँबाट हटाएको छ । इजरेली हमलापछि इरानले इजरायलमा मिसाइल आक्रमण गर्न थालेपछि अमेरिका अहिले मध्यपूर्वमा रहेका आफ्ना सैन्य अखडाहरूको सुरक्षालाई लिएर त्रासमा रहेको छ । इजरेललाई जोगाउन इरानलाई बमले उडाइदिने धम्की दिइरहेको अमेरिका आफै कतारबाट भागेको छ ।

समाचार एजेन्सी एएफपीका अनुसार विगत दुई हप्तामा कतारको प्रमुख अमेरिकी एयरबेसबाट करिब ४० अमेरिकी सैन्य विमान बेपत्ता भएका छन् ।

सम्भवतः यी सैन्य विमानहरु इरानी आक्रमणबाट बचाउन हटाइएको हुनसक्ने जनाइएको छ । जुन ५ र जुन १९ को बीचमा लिइएको प्लानेट ल्याब्स पीबीसीबाट स्याटेलाइट तस्बिरहरूले एक समय प्याक गरिएको मध्यपूर्वको सबैभन्दा ठूलो अमेरिकी एयरबेस लगभग पूर्णरूपमा खाली भएको छ ।

जुन ५ मा कतारको अल उदेद एयरबेसमा सी–१३० हर्कुलस ट्रान्सपोर्ट प्लेन र अत्याधुनिक जासुसी जेटसहित ४० वटा विमान खुलारूपमा पार्किङ गरिएको थियो ।

जुन १९ को स्याटेलाइट तस्बिरहरूले तीन वटा मात्र जेट विमान बाँकी रहेको देख्न सकिन्छ । कतारमा रहेको अमेरिकी दूतावासले बिहीबार बेसमा पहुँच धेरै सावधानी र जारी क्षेत्रीय शत्रुतालाई ध्यानमा राखेर सीमित हुने घोषणा गरेको छ । यसका साथै बेसक्याम्पका कर्मचारीलाई पनि थप सतर्कता अपनाउन आग्रह गरिएको छ ।

इजरायलले इरानमाति हमला गरेको एक हप्ता बितिसक्दा पनि अमेरिका यसमा सामेल भएको छैन । इरानमाथि हमला गर्ने योजनामा सही गरेका ट्रम्पले अन्तिम निर्णय गर्न फेरि २ हप्ताको समयसीमा सारेका छन् ।

कम्तिमा २७ सैन्य इन्धन भर्ने विमान केसी ४६ ए पेगासस र केसी–१३५ स्ट्राटोट्याङ्कर विमानले ९ जुन १५ र १८ का बीचमा अमेरिकाबाट युरोपको यात्रा गरेको विमान ट्र्याकिङ डेटाको एएफपी विश्लेषणले देखाउँछ । अमेरिकी सेनाका पूर्वलेफ्टिनेन्ट जनरल र रान्ड कर्पोरेशनका रक्षा अनुसन्धानकर्ता मार्क श्वाट्र्जले एएफपीलाई भने कि इरानसँग नजिक भएका कारण अलउदेदमा रहेका हाम्रा विमान अत्यन्तै असुरक्षित हुनेछन् ।

इजरायल र इरानबीचको युद्धका बीच मध्यपूर्वमा अमेरिकी सेना उच्च सतर्कतामा छ । हाल सम्पूर्ण क्षेत्रमा करिब ४० हजार सैनिक तैनाथ छन् । जहाँ सामान्यतः यहाँ ३० हजारको संख्यामा तैनाथ हुन्छ । इजरायल र इरानबीचको तनाव र लालसागरमा जहाजहरूमा हुथी विद्रोहीको आक्रमणका बीच अक्टोबरमा त्यो संख्या बढेर ४३ हजार पुगेको थियो ।

यता ट्रम्पले इरानमाथि हमला गर्ने कागजमा हस्ताक्षर गरेको केही समयमै रुस र चीनले अमेरिकालाई धम्की दिएका छन् । रुस र चीन व्यापारी र इरानका सैन्य साझेदार देशहरु हुन् ।

एकातिर रुस र चीनको धम्कीपछि ट्रम्प इरानमा बम हान्नबाट पछि हटेको अनुमान गरिएको छ भने अर्कोतिर इरानसित नजितिने युद्धमा फसेर अमेरिकाको अर्थतन्त्र झन डामाडोल हुनसक्ने खतराको आँकलन गरेर ट्रम्प पछि हटेको हुनसक्छ । ट्रम्प एउटै घटनामा विहान एउटा र बेलुका अर्कै बोली बोल्ने अस्थिर स्वभावका व्यापारी शासक हुन् ।